Дакъа лаьцар, Россе Минпромторга региональни промышленни политикаи проектни урхалени Департамента директора Хоценко Витале, иштта премьер-министра Сластенин Владимира, хьалхарча вице-премьера Фурсов Олега, регионий ведомствайи учрежденейи кулгалхоша.

Цига дийцар, республика инвестице таронаш хьаллацар, кIала промышленноста кластер караэцар, лаьтташ леладара йолча технопарка йоакхо яр, цун кластер хьакхоллар, кхыдола хаттараши.

Кабмина кулгалхочо белгалдир, керда балха моттигаш хьаяр паччахьалкхен керттера декхар хилар. Карарча хана, ГIалгIайче 4,3 эзар зIамагIчеи юкъерчеи предринимательства субъект я, цо лу наха 5,7 эзар балха моттигаш.

Республике, дIадахача шера, керттерча капитала чубоагIа инвестице боарам хилар 21705, 4 млн сом.

Хоам бу, ГIалгIайче, укх шин шера болх бе йолаеннай 10 промпредприяти: йоккха, хIамаш тега фабрика — 1500 балха моттиг, кога гIирса производство, хьу чакхйоккха комбинат, металлургически завод «Кавказ-Реал». Цул совгIа, боккхача боарамах йола, коа тIарча оалхазарий (москалаш кхею) комплекс, цу оалхазарий дулх а кечдеш, шера 10 зар т. кхаччалца.

Кастлуш, Республике хургья берий унахцIенон гIирсаш ду «БестБренд» яха завод, строительни кхоачам лу комбинат а тоеш латт.

Иштта, Республике, керттера йоакхо ю тайп-тайпарча оагIонех йола кластераш дегIакхувлара. Из ба, цхьалха хьаийцача, юртбоахамеи, туристически отраслешкереи бола болх.

Хоценко Витале доакъашхошка хьоахадир, паччахьалкхено лоаттаду новкъостал а. Из 100% кхаччалца йола субсиди я, алапи а долаш довр дIалаьрхача, 70% кхаччалца кредит юхаметта оттадар, иштта кх.д.

ЛоархIаме вIашагIкхетар чакхдаьлча, Хоценко Витали регионера промышленни объекташ йовза вахар.