Гӏалгӏайчера СВО бӏухочун дай салаӏа, дарба де гӏоргба
Гӏалгӏайчен лаьрххӏача операце ветерана Йовлой Абабукара да-нана, «Даьхен лорабой» ганза моттигерча филиало новкъостал дарах санаторен-курорта дарба де гӏоргба. Уж болча цӏагӏа чу а яха, царна новкъостал деш хилар вахара оагӏон болх лелабу Беканаькъан Мадина.
«Сердало» газетага «Даьхен лорабой» ганзо ма аллара, из гӏулакх кхоачашде таро хилар Россе Федеральни лорий-биологически агентствоца бувзам хиларах. Вахара оагӏон болх лелабечо деррига хаттараш шийна тӏаийцар, цо сиха новкъостал дир эшаш дола каьхаташ даха; цул совгӏа, из царна новкъостал деш хилар путёвка хьаийца яллалца.
Массехк ди кхы даьлча, бӏухочун да-нана гӏоргба Ессентуки-Шахьара «Юность» яхача санаторе шоай могашал тоае.
Ганза керттера декхар да бӏухой дезал хьаллацар, царна лорий гӏо лоаттадар.
