«ГIалгIай Республике гIолла йолча Росгварде урхаллен полице майора Исмейланаькъан Аслана Наьсарен ишкола дешархошта дийцар, концлагера тутмакхаш мукъабаьха Ерригроссе ди бекарга бетта цхьайттлагIча дийнахьа хилар.

Цу дийнахьа 1945 шера эггара йоккхагIйолча Бухенвальда коцентрационни лагере лаьца боахка нах гIайттар, цул тIехьагIа чубехкача наьха таро хилар, Нюрнбергски халкъашта юкъерча судага хиннар дIадувца, цигга дерригача дуненна бIаргаяйра моастагIчун юхьмараш», — йоах хьабайтача хоамо.

Иштта къонача ладувгIархошта довзийтар, цига лаьца баьхкача наха тIалоаттадеш хинна Iазап, герзаш деттар, уж халбата боахкабар, миллионаш бехк боацача наха гитлеровцаша човнаш яр, дерригача адама духьала даь зулам из хилар.

«Уж халонаш лайнача наьха цу Iазапа духьалъотта низ хилар, тахан вайна масал гойташ да из, цIаккха а фашизма къизал йиц ца йолийташ.

Кхувш йоагIача тIехьенна ха дезаш да, малагIа мах бенна, Сийлахь-йоккха Котало яьккхай», — аьлар полице майора Исмейланаькъан Аслана, из лоархIаме кхетаче чакхйоалаш.