Дешара моттигашта юхерча тока гӏирсий хьал тохкаш я «Къилбаседа Кавказа Россеташ»
«Дешара моттигашта, ахкан хана бераша салоӏача лагерашта юхерча доазон тӏа латтача тока гӏирсий хьал тохкаш, кхерам болаш хӏама дий хьожаш хилар «Къилбаседа Кавказа Россеташ» тока, ЖКХ оагӏонца дувзаденнарех йолча министерствон болхлошца. Трансформаторий гӏулакх боаггӏача боараме дий, чӏегаш доханза, цхьаккха кхоачамбоацараш юкъедоацаш дий хьожаш болх дӏабихьар цар.
«Тока моттигех къаьстта бераш лорадар лоархӏамеча гӏулакхех да тахан, цунга хьежжа хан-ханнахьа терко еш, хӏама телха болх бий хьожаш, хила беза токацара гӏирсаш латтача доазон тӏа.
Цул совгӏа берашца, хьехархошца, цар даьшца, ноаношца болх лоаттабу оаха цу хьакъехьа. Къаьстта даьржа да из, бераш аьхки салоӏаш цӏагӏа долча хана. Тока моттигашта гаргаваха, кулг тоха, цу юхе ловзаш валла йиш йоацилга хьалхадаха деза боккхийбараша», - дийцар «Ингушэнерго» филиала кулгал деча Котаганаькъан Кимрана.
Дешара моттигашта, иштта бераша салоӏача лагерашта юхерча тока гӏирсий балхага хьожаш хилар Россетий программан юкъера керттера оагӏув ба. Программан юкъе да берашца тематически урокаш, яхьаш, викторинаш, тока моттигашка экскурсеш дӏакхахьар.
