Кхетаче дӀахьош дийца дош дар Пригородни кхалени ГӀалгӀайчени юкъера бувзам лелабеш йолча транспорта хоттаденна. Бахархой латкъаш хилар транспорт геттара тишъенна хилара а иштта ший ханнахьа из лелаш цахилара а. Ший аргӀагӀа ГӀалгӀай Республикан промышленноста, бувзама министерствон викала аьлар, из хаттар шоаш тохкаш а да, ер шу чакхдалале кхоачаш а дергда, аьнна. Цул совгӀа, гулбеннараша белгалдир, Пригородни кхаленца бувзам лелабеш йола транспорт тишъенна хилара хаттар ма хулла сихагӀа кхоачашде дезаш хилар а, иштта укхаза бахаш бола нах балха оттабе безаш хилар а. ШоллагӀча хаттарах дувцаш, Мизенаькъан Руслана белгалдир, укх тӀехьарча хана ГӀалгӀайчен кагирхой гранташ йоахача яхьашка дакъа лоацаш хилар бахьан долаш, уж балха оттабара дош юкъ-юкъе кхоачашде таро хул, аьнна. «Дика хургдар укхаза а цу тайпара хаттараш кхоачашде таронаш хьакхолларе, масала, тайп-тайпара спортивни майдаш хьаеш, зӀамигача футбола аренаш еш хилча, ший аргӀагӀа цо таро хулийтаргьяр моттигерча а федеральни а яхьашка дакъа лаца», - аьлар ГӀалгӀай Республикан миннаца кулгалхочо. Къилбаседа ХӀирийчен оагӀорахьара а белгалдир, кагирхой балха оттабеш, унахӀена вахар леладара наькъ тӀа боахаш дола балхаш шоаш дӀахьош хилар. «Цудухьа Пригородни кхален даькъ тӀа лаьрхӀад ФОКа гӀишло хьалъе», - аьлар Багиев Алана.