Эккажкъонгий-Юрт тоае лерхӏ Наьсарен кхален кулгалхоша
Наьсарен кхален администраце кулгалхо вола Овшанаькъан Мухарбик, Эккажкъонгий-Юртарча моттигий хьал миштад хьожаш хилар. Цунца вар гӏонча Исмейланаькъан Темарлан, кхален администраце болхло Тӏоаршхой Мухьмад. Юрта кулгалдеча Йовлой Мухьмадаца дӏайихьача кхетаче, Эккажкъонгий-Юрта хьалхашка латтача кхоачамбоацарех дийцар цар.
«Къаьстта терко йир юртарча моттигий куц тоадара. Эггара хьалхарча оагӏонца кулг тоха деза урамаш малагӏаш да, бахархой хьал аттача даккха сенгара дӏаволавала веза белгалдир хьакимаша. Иштта кхетаче дийцар хӏара деннарча бахархой оагӏорахьарча дехарех, царна къувларех. Хьаӏайна латта кхоачамбоацараш дӏадахар да эггара керттердар», - йоах «Сердалога» Наьсарен кхален администраце зарбан болх лелаберашкара кхаьчача хоамо.
Дукха ца говш, болх дӏаболабе беза моттигаш къоастайир тахан. Юртарча администрацеца хӏара денна бувзаме хила, аьнна, тӏадиллар кхален кулгалхочо. Юртарча, кхален администрацей болхлоша цхьана къахьегаргда Эккажкъонгий-Юртарча моттигий хьал меттадоаладеш, дукхача хана денз наьха сатем боабаьраш кхоачашдеш.
