ГӀишлой QR-кодашка гӀолла цар болх малагӀча боараме ба теркалде йиш хургья бахархой
Хьалъеш латтача гӀишлоех дӀалотаяьча QR- кодашка гӀолла, шоашта цу гӀишлон балхах хетар ала йиш хургья вай мехкарча бахархой. Из хоам «Сердало» газетага бир Мехкадаь зарбан болх лелабераша.
«Болх йистебаьнна, дӀачуеннача хӀара гӀишлон тӀа QR-код оттаергья къаман проектий балха хьалхалаттараша. Цу гӀулакхо бахархошта аьттув лургба, дӀабихьача балхах шоашта хетар ала. Нагахьа кхоачамбоацараш ходенна моттиг яле, из теркалде», - белгалдир вай мехкадас Келаматанаькъан Махьмуд-Ӏаьлас. Шийна хетар язде йиш я, дӀахьош латтача балхах наха новкъарле хиннаяле, хийттача беса болх чакхбаьккхабеце.
Мехкадас белгалдечох, бахархошца бувзам лоаттабеш, нийсденна кхоачамбоацараш ханнахьа юстардоахаш, болх дӀабахьа аьттув лургба цу гӀулакхо. Келаматанаькъан Махьмуд-Ӏаьлас теркалдир, из деррига наьха вахар аттачахьа даккха, иразе, паргӀата хилийта юкъедаьккха долга, цудухьа бахархоша шоашта хетар алар чӀоагӀа лоархӀаме да.
