ГӀалгӀай мехка, Ӏуйрийна денз, дукха нах ба кхадж тоссаш
Тахан нийсса 8 сахьат даьлча, ГӀалгӀайчен шахьарашка, юрташка хоржамий доакъош тӀа наӀараш хьайийллар, Российски Федераце президент харжара. Вай мехка 142 даькъ тӀа кхадж тоссаргба, цига хӀанззе а дукха нах хьаухаш хилар белгалдаьд, яхаш, дийцар «Сердало» газета корреспондентага.
«БоккхагӀа болча викалаша Ӏуррехь а шоай кхадж тассара болх чакхбаьккхар», - йоах хоамо.
Республикан столице Магас-Шахьаре дукхача бахархоша шоай граждански декхар кхоачашдир; российски паччахьалкхенна керте латтаргвар хоржаш. Цу лоархӀамеча дийнахьа хургья аьнна хьакхайкаяьча йиъ ярмарках цхьанне ший болх дӀаболабир, кхачан продукташ йохкаш.
Ӏуррехь а тӀема сийлен шахьаре МагӀалбике кхадж тоссаш барех хьалхарбараш хьакхаьчар. Ший мехкахошта дика масал гойташ, къоаночо Ӏалбаканаькъан Мустафас ший кхадж тессар.
Шолже №903 йолча даькъ тӀа кхадж тессар шахьара тхьамадас - 74 шу даьннача Марзенаькъан Бахьаудина, ше цу дийнахьа граждански бехктокхаме хилар белгал а деш.
Илдарха-ГӀалий тӀа ха яхача наха, кхадж тоссача моттиге дагалоаттама совгӀаташ лу. Царех цаӀ ва 78 шу даьнна Мусенаькъан Махьме Суламбик. Цунна лайра хургвола РФ президент къахетаме а, нийсхо йолаш а хилар.
ГӀалгӀай Республикан эггара дукхагӀа нах бахача шахьаре, ший оаз дӀаелар ГӀалгӀай Республикан Парламента кулгалхочо ТӀумхой Мухьмада, Дошлакъий-Юртарча №9 йолча ишколерча № 609 даькъ тӀа тессар цо кхадж.
Белгалдаккха деза, Россе президента хоржамаш дӀахьоча дӀадолалуш дола дакъа мара из доацилга. Из хӀара минот массаза йоал хувцалуш доагӀа, нах дукхагӀа хиларца. Керттердар ГӀалгӀай мехка из лоархӀаме юкъара-политически хьал лакхача боарам тӀа дӀахьош хилар, харжархой дукха хилар да.
