Тахан ГӀалгӀайче «Онкохаьхо» яха болам дӀаболабу
Таханарча дийнахьа денз, ГӀалгӀай Республикан унахцӀенон министра Антошканаькъан Заремас тӀадиллача декхарах, кӀира цкъа вайцига «Онкохаьхо» яха болам дӀахьоргба. Из ГӀалгӀайчен дукхача юрташка хургба, бахархоша шоай могашала, цӀийоацар оалача лазара терко дикагӀа ергйолаш, яхаш, дийцар моттигерча унахцӀенон министерстве.
Болам дӀаболалургба тахан, лайчилла бетта 22 дийнахьа, Наьсарерча Фабрични урам тӀарча «Корона» яхача мах беча центра юххе. Цу моттиге, 10 сахьат даьлча денз 16 сахьат даллалца, болх беш хургья дӀа-юха лелаш йола мобильни пункт, безам бар ший могашалга хьажа йиш йолаш ва цига.
«Онкохаьхо» яхача болама чудоагӀаш да лораша-онкологаша, мах боацаш, цхьацца хьехамаш дар. Иштта онкологеца дувзаденна а кхыдола а лазар дий хьожаш, мах бала ца безаш, нах лорашка чакхбоахаргба.
Бахархой тӀахьех, шоай могашал миштай хара, цига чакхбала. Хьалххе а гучадаьннача онкологеца дувзаденнача лазара дарба деш аттагӀа да», - аьлар унахцӀено лораераша.
