ГӀалгӀайчен маьждигашка, 1944 шера мехкахбаьхача байнарашта маьл кхайкабир
23.02.2024 11:49
Дезача пӀаьраска дийнахьа, нах мехкахбаьха 80 шу дузаш, ГӀалгӀайчен массадолча маьждигашка мехкахбаьхача хана байнача наха маьл кхайкабир, яхаш, дийцар «Сердало» газетага мехка министрий кабинете.
«ГӀалгӀайчен массадолча маьждигашка жамӀата ламазаш а дергда, маьл кхайка а бергба, мехкахбаьхача байнача вай наха», - аьлар хоамо.
Дин викалаша, хьаухача наха, Сийдолча Даьлагара дех, цу унзарча, къизача шерашка, шоай фусамех баьха ара биса, кхыча мехка болаш, шоай хьамсарча мехках хьагаш байнача наха гештдар. Укх деношка ГӀалгӀай мехка сагӀа луш да, хьалхарча аргӀагӀа дукха дезал барашта, таро йоацарашта.
