«Къаман исторех, культурах дараш юкъелоацаш хургья «Даьре никъ» яха парк. СалоӀаш вагӀа, хӀама кхалла, берашца ловза, цхьацца хӀама эца йиш йолаш моттиг хургья цу парках. Из деррига а вай къаман йӀаьхий йолча культуран юкъе хургда», — белгалдир вай Мехкадас Келаматанаькъан Махьмуд-Ӏаьлас. Хоза хувцамаш деш, кулг тоха лерхӀ 10-ча микрорайнерча Победы оалача ураме, Кулиева, Горчханова оалача урамашка, цу микрорайонерча сквере. Нах дукхагӀа лелаш, салаӀа сувцаш йола моттигаш я уж. ГӀалан юхерча доазон тӀа уллача «Даьре никъ» яхача парке таханарча хано дӀадеххача тайпара долча куцаца дувзаденна хувцамаш хургда. Доккха тур, кхуркхолг, иштта кхыйола хӀамаш оттаяь, къаман культурацардараш гойташ хургья из моттиг. Туристий бӀарг тӀаоттаргбола хувцамаш де лерхӀ цига. Шахьара куц тоадара тӀехьа хӀара шера къахьег республике.