Юртбоахам дика дегӀабоагӀаш латт
ГӀалгӀайчен юртбоахам дика дегӀабоагӀаш латт. Из иштта хилар бахьан да, ахархоша дика къахьегаш хилар а, иштта паччахьалкхен оагӀорахьара новкъостал лоаттадеш хилар а. Из белгалдир ГӀалгӀай Республикан юртбоахама, кхачан министра Гаьгенаькъан Мухьмада.
Вайцигарча АПК паччахьалкхено новкъостал ду шин оагӀорахьара: «ЗӀамига, юкъера бизнес дегӀайоалаярца», «Халкъашта юкъера кооперацеца, экспортаца».
Хьалхара халкъа проект кхоачашъеш, «Фермераш хьаллацара бола болх вӀашагӀболлар, юртара коопераци дегӀайоалаяр» яха ший проект дӀахьош я. Из дӀахьош, министра яхачох, республикан 95 сага 50 млн 720 эзар сом луш, паччахьалкхено новкъостал даьд юртбоахам дегӀабоалабеча даькъе. Цул совгӀа, субсидеш а дӀакхаьчад нахага, юртбоахам дегӀабоалабеш хинна зе меттаоттадара лаьрхӀа 42 млн 711 эзар сом.
«ГӀалгӀайчен юртбоахам дика дегӀабоагӀаш латт ахархоша лерттӀа къахьегаш хиларах, иштта паччахьалкхено царна новкъостал деш хиларах. Сога хаьттача, субсидеш луш хиларо наха чӀоагӀа новкъостал ду, балха говзал йолча фермерашта, хӀанз мара шоай доалахьара гӀулакх дӀадоладеш боацарашта цунах дика пайда боал. Цунга хьежжа, республикан а берригача мехка а кхачанца Ӏалашо е таро хул», - аьлар Гаьгенаькъан Мухьмада.
Белгалдаккха деза, юртбоахам дегӀабоалабара юкъе ший дакъа денад доалахьара боахамаш леладераша, уж шергара шу массаза доал совбоалаш боагӀа.
