Эбарга-Юртара культуран ЦIа тоадеш дIабихьача балхага хьежар сенатор Илезанаькъан Микаил
Юрташкара культуран оагIонца дувзаденнараш ма хулла тоаде гIерташ къахьегаш ба мехка. Мехкадас Келаматанаькъан Махьмуд-Iаьлас тIадилла декхар кхоачашдеш, Эбарг-Юртара культуран ЦIа тоадеш дIахьош латтача балхага хьежар сенатор. ГIишлонхошца къамаьл деш, болх малагIча боараме кхоачашбеш ба техкар цо.
«80%-га кхоачаш кийча я ала йиш я из моттиг тахан. Пенаш шаьрдеш, кIалхара кIийле хувцаш, иштта керда камераш йохкаш, йIовхал, фо лоаттаду гIирсаш хувцаш къахьийгад цига. Кхы а дIахо кхоачашде дезараш белгалдир болхлоша. Ала деза, тахан цу балха тIахьожам лоаттабеш, лакха терко еш болга мехка. Беррига болх чакхбаьлча, таханарча ханага хьежжа дола культуран цIа хинна юртахой гIулакха болх бе доладала дезаш да из», - йоах «Сердалога» мехкарча паччахьалкхера бенача хоамо.
Юрта бахача наха чIоагIа лоархIаме хувцамаш да тахан хулаш латтараш. ЛерттIа тоадаь латтача культуран цIагIа кагирхой, бераш тIалатт, къаман Iадаташ, гIулакхаш лорадара, доаржадара тIехьа болх лоаттабу, лоархIаме кхетаченаш дIаяхьа юртахой вIашагIбетталу.
