Дукхача ловцашка белгалду, хьакхеллача денз, наха уллув латташ, цар хьашташ довзаш, ший оагIонаш тIа наха карагIдоалар, цар хьашташ, дагалаттар дувцаш, газет хьадена хилар. Нах мехкахбаьхача хана, из арадоалаш хиннадеце а, бакъда из ца «леш» дисар. Халача вахара хьалашкара нах юха шоай мехкабаьлча, из юха а доладелар болх бе. Цул тIехьагIа эттача йоазанхой, поэтий оагIув хинна хьадера из, цу газетага гIолла цIи хезар дукхача вай йоазанхой. Кхыметтел ГIалгIайче юхаметтаоттаяьчул тIехьагIа, республике литературни альманах арадала доладелча, кердача ноахала йоазанхой ловш бар «Сердало» оагIонаш тIа шоай йоазонашта кепа тохийта — иштта чIоагIа бар наьха газетацара бувзам.

Из деррига а белгалду наха тахан, ловцаех хьалдизача социальни бувзамашка гIолла, къаьстта телеграм-канале.

«Сердало» газет вай республике хиннача хувцамий бIаьшерен исторен теш хилар. Дукхача цIихезача поэташа, йоазанхоша, журналисташа, газет кепа теха арадала доладелча денз, шоай йоазонашта кепа йийттар цу тIа, цунца цхьана наьха безам тIаозаш.

ГIадвугаш дар да, газета оагIонаш тIа вай къаман вахарах дувцаш хилар. Массане а терко ю карагIдоалачун, воашта могар ду юкъе нийслуш дола кхоачамбоацараш юстардахара», — яхаш язду единороссаша.

«БIаь шу — из бIарчча зама я, из ювца таро хиннай газета оагIонаш тIа. БIаьшерен вахаре ГIалгIайчен хувцамашта тIехьа хьожаш хиларал совгIа, «Сердало» газета ший къаманца цхьана декъ моллагIа вахаре хиннар.

Тахан «Сердало» газет хьадеш болча болхлошка ала ловргдар сона: шун йоазув цIена а ира а хилда, хIаьта журналиста дош — нийса а дIакхетаргволаш а», — аьлар ГIалгIай Республикан юртбоахама, кхачан министра Гаьгенаькъан Мухьмада.

«Массайолча ханашка юкъарло дегIаяра доккха дакъа дIалоацаш хиннад газет. Цу тайпара да ГIалгIайчен «Сердало» газет, ше болх бе доладелча денз. Из дезаш хиннад хIара цIагIа, из хиннад массане а дагара новкъост», — йоах ГIалгIай Республикан гIишлошъяра министерствон ловца тIа.