Цига дахаш долча, хӀара денна даьй ханара гӀишлош гуш долча берашта, из иштта хила дезаш санна хет. Цудухьа боккхагӀбараш декхарийла ба хьалхадаккха, тӀехьенгара тӀехьенга а кхоачаш; из хьадоагӀаш хилар, къаман культуран-исторически тӀехьале хилар, лорадеш леладе дезаш хилар. «Цу моттигашка сакхетам болаш, лостам, цӀено лелаеш хила веза. Кхерах яьча гӀишлош тӀа, шоай йоазош дита йиш яц. Цигара архитектуран гӀишлош тIара «дагалоаттама» цIагIа лелае хӀама яхьа а йиш яц. Оаш кхетаде деза, моллагӀа а шоана зӀамига хеташ йолча культуран мах болча хӀамах зе доалаш хила а тарлулга», - аьлар музея болхлочо.