Хаттараш луш бола болх дӀахьош, цхьадола гӀалгӀай метта юкъера дешаш довзаш дий хьежар, иштта цхьадола дешаш гӀалгӀай меттала мишта ала деза а хайра. Бакъда цу юкъе нийсбенна цхьабола кагирхой хьалхашка оттадаь декхар кхоачашде ховш хиланзар, иштта дале а, цхьаболча доакъашхоша дош делар дӀахойодача хана шоаш из Ӏомабергба, аьнна. Цудухьа хаттарий балха юкъедоагӀаш хинна керттера декхар из болх вӀашагӀбеллараша кхоачашдир - наьха гӀалгӀай меттацара безам сомабаьккхар.

Цхьа хӀама дар цу юкъе белгалдаьнна. Жоп луш хиннарашта юкъе цхьаккха а вацар «черемша» яхача деша таржам де цаховш. Из массанена дика ховш хилар. Цох тамаш елга а дац, хӀана аьлча из ГӀалгӀайчен хьунашка хьахулаш дола пайдане даар ца довзаш мала хургва вайх? Тамаш елга дар «радуга» яхача деша таржам де цахар, дукхача берашта из довзаш дацар.

Кхы вӀалла деце а, ткъаь итт шу совгӀа ха ма йий вай мехка «СелаӀад» яха къаман журнал арахецаш дола. Цу журнало хьагойт гӀалгӀай къаман культура, Ӏадаташ леладара масал, из кепайоазонга гӀолла вай ноахалга кхоач.

Бакъда берашта юкъе деша безам бараш кӀезига хиларо мотт дегӀабоалабара, из лорабара йола моттиг яьсса ют, тӀехьа тӀайоагӀача тӀехьенна. ДукхагӀа кхетаченаш дӀаяхьа еза, «СелаӀад» яха журнал дикагӀа довзийтара. Из декхар да хӀанз хьакхеллача, из берий журнал а чудоагӀача «Сердало» яхача кепайоазон цӀено шийна хьалхашка оттадер.