Дешархой Ӏомабу бувзама гIирсашца лоралуш хила
03.10.2023 09:11
ГӀалгӀайчен МагӀалбика кхален Кердача Реданта культуран цӀагӀа дешархошца къамаьл дир бувзама гIирсех боалача пайдах а зуламах а. Къамаьл чӀоагӀа терко тӀайодаш а эшаш а хилар, бераша дикка уйла тӀаяхийтар дувцаш хиннача хIаманна. «Социальни бувзамга гӀолла наха юкъера бовзар хотталу. Цига гӀолла ший гаьнара доттагӀал дола нах лаха хьож, е шийца дешаш хиннарашцара бувзам безаш хул, е гаьнара гаргара саг лохаш хул.
Цул совгӀа, нах шоайла гаьна бар аьнна доацаш, къамаьл де таро йолаш а хул бувзамга гӀолла. Бакъда из хеттача беса нийслуц. Социальни бувзамга гӀолла хила йиш йола зе - шийна беззача тайпара мара из хоам тӀаэцаш цахилар. Из дукхагӀча даькъе харцахьа кхетабе йиш йолаш хул, бераша чӀоагӀа хала хеташ тӀаэц из», - аьлар «Сердало» газета корреспондентага ше къамаьл деш культурно-салоӀама моттига кулгалхочо Хоаной Марета.
ЛоархӀаме да дешархой шоаш лорабала Ӏомабар, цхьаннена тӀехьабаьнна дӀагӀоргбоацаш. Из хьеха хьежар Кердача Реданта культуран болхло.
