Афганистане лаьттача тӀема доакъашхоша кхетаче йир МагӀалбикерча дешархошца
МагӀалбикерча № 20 йолча ишкола дешархошца, вӀашагӀкхетар дӀадихьар Афганистане лаьттача тӀема доакъашхоша. Афганистанера советски бӀухой арабаьха 35 шу дизара хетаяь яр из кхетаче.
«Россе Герзашцарча низий министерствос белгалдечох, 1979-ча шера Ӏан хьалхарча бетта 25-ча денгара денз 1989-ча шера Ӏан тӀехьарча бетта 15-ча денга кхаччалца, Афганистане тӀема декхараш кхоачашдеш лаьттав советски 620 эзар бӀухо. Царна юкъе хиннаб вай къаман деналах, майралах бизза бола къонгаш. Деналца ший декхар дӀахьош хиларах Советски Союза турпал аьнна цӀи енна вай къаман хьалхара президент Овшанаькъан Руслан хиннав цига, капитан волаш батальона кулгал деш. Къаман сийдолча къонгий цӀераш йицъе бокъо яц вай!» - дийцар хьаьшаша берашка.
Афганистанерча тӀема ветеранаша берашка дийцар, тӀема декхараш токхаш цига шоашта нийсъеннача халонех. Даьхе лораяр - хӀара къонахчун декхар долга хьалхадаьккхар кхувш латтарашта.
