Шозза айдаьчул тӏехьагӏа, пенсе юкъера боарам мишта хургба къоастадеш ба тахан Соцганзе
2027-ча шера Россера «страховой» пенсеш шозза айде лерхӏ – хьалхагӏа цкъа тӏакхеташ хиннар хӏанз шин оагӏонца айлуш хургда. Паччахьалкхен Думе ардара бетта 29-ча дийнахьа баь соцам ба из. 2027 – 2029-гӏа шераш чулоацаш йолча Россе вахара ганза проектацара хувцамаш да ала деза царех. Оттадаьча каьхатах, саькура бетта 1-ча дийнахьа пенсеш 6, 8%-га кхоачаш айдергда, хӏаьта бекарга бетта 1-ча дийнахьа денз кхы а 3,3%-га кхоачаш. «Сердалога» из хоам бера мехкарча Паччахьалкхера.
Тахан белгалдечох, къоанала доагӏаш долча пенсе юкъера боарам 2027-ча шера 29,9 эзар сомага кхоачаш хила беза. Болх беш боацача пенсионерашта доагӏар юкъерча боарамга диллача 30, 2 эзар сом хургда, цу шера юкъерча боарамах тӏакхетар 2, 6 эзар сом хургда. Теркалде деза, из юкъерча боарамга диллача хулар долга. Ма дарра аьлча, хӏаранена тӏакхетар тахан цо ийдеш долча пенсе боарамга хьежжа хургда – таханара пенси лакхагӏа дале, цунга хьежжа дукхагӏа хургда ӏотӏакхетар а.
Шозза пенси айдара юкъеболх берригаш – ха къоанала пенси ийдераш, заӏапхой- пенсионераш, иштта тӏера да дӏаваларах пенси доагӏараш. Вахара ганзе белгалдечох, берригача мехкара 37, 5 миллион адамах хьокхалургда из гӏулакх. Дехар чудала ганзе тӏаваха ца везаш, хьаотташ хувцамаш да уж.
