Нувхаш дIайоахаш, догIаша ураоттаяь буц дIахьокхаш, гаьнашта, бордюрашта кIир тохаш, къахьийгар цар. «Из тайпа болх цу моттиге каст-каста беш ба. Цхьа цIаьхха дагадеха хIама дац из. 2013-ча шера, нах дIа-хьа кхувлаш йола еррига машенаш, метан яхача экологически цIена лоархIаш долча доагорца лела йолаеннача хана денз, юкъедаьккхад из беркате гIулакх.

Массе моттигашка лостам, цIена хилар дезача болхлоша оттадаь, цхьана, барт болаш, хьадахьаш да из гIулакх», — йоах тхога бенача хоамо. «Хан-ханнахьа балха шоатта дIахьош хилар, тхона массанена чIоагIа лоархIаме да. Бусалба нах кхестача моттиге, массахана цIена, хоза лостам болаш хила еза. Вай дино яхаций вайга иштта хила!? Оамалаш, дог, уйлаш цIена долаш санна, цIено лоаттае еза хIара сага шийна гонахьа а», — дийцар цигарча цхьан болхлочо. Вай республикерча наькъашкара хьал экологически оагIорахьа тоадара тIехьа кхелла паччахьалкхен программа я дIахьош. Юртбоахама доалахьара, ЖКХ машенаш цIенагIа долча доагорца болх беш хургйолаш, къахьегаш ба вайцига. Дикка тоадеш, дIахьоргдолаш да из гIулакх дIахойодача хана.