СВО доакъашхой оагӏув хьаллоацаш ба Россе УФСБ вай мехкара болхлой
«Къаман фронт. Деррига а котало бахьан!» яхача ерригача Россе боламга гӏолла боккха болх ба вай мехка дӏахьор. СВО доакъашхой оагӏув хьаллацара тӏехьа доккха дакъа лоацаш ба тахан Россе ФСБ моттигерча оагӏон болхлой. Даьхен гӏулакха арабаьннарашта лаьрхӏа хӏамаш хьаелар цар укх деношка. «Сердалога» из хоам мехкарча Къаман фронта исполкома кулгалхочо Тенканаькъан Башира бир.
«Тӏема операци йолаеннача дийнахьа денз, цига дакъа лоацаш болча бӏухой оагӏув хьаллацара тӏехьа лоархӏаме дакъа лоацаш хьабоагӏа Россе ФСБ моттигерча оагӏон къахьегамхой. Тайп-тайпара кхоачам ба бӏухошта ӏокхухьийтар», - дийцар тха газетага. Укх наькъа УФСБ болхлошкара 1000 совгӏа кхачан даараш чудола кӏопилгаш хьаелар къаман фронта доакъашхошка.
Ӏохьош атта, ханнахьа талхаш боаца кхача чуболаш я кийчъяь кӏопилгаш. Цу юкъе я консерваш, кийчдаь дулх, ӏовнаш, чай, кофе, мерза кхача, иштта кхыйола хӏамаш а. Укх деношка ӏокхоачаергья Къаман фронто уж хӏамаш. Белгалде деза, иштта оагӏув хьаллацар тӏема аренашка цӏенга сатувсаш лелача наха чӏоагӏа лоархӏаме долга. Бӏухой дегаш ураувттадеш, низ чуболийташ да иштта терко лоаттаяр, дагабоахкилга дӏахайташ хилар.
