Наркотик цхьанахьа Iоехк, дIаяхьа аттагIа хургдолаш, бера бе луш шоаш лоацаргбоацаш, ахча интернете голла дIатIатувс. 2021-ча шера, 331 зулам гучадаьккхад Iаьдала болхлоша. Наркомани яржаш латт, ма даггара духьале лоаттаешшехьа. Тахан цу зуламо толхабеш латтараш вай кхоачара нах ба, цудухьа вай дерригаш оарцагIдала дезаш да этта хьал.

Кастта депутаташа йоккха кхетаче дIахьоргья зулама духьалара керда наькъаш кхоллара гIулакх дувцаш», — белгалдир, парламента спикер волча ТIумхой Мухьмада.

Ваделанаькъан Джамбулата хьоахадир, тахан республикерча дешара кхуврчашка дийша нахи, Iаьдала болхлойи юкъе болаш «Наркотикашта духьала —  езац ала» яхача лозунгах дIакхухьаш кхетачеш йолга. Цар дувц кагирхошка, цу дохьажах доалача зенах. Дуккха масалаш кхувл, кагирхой вахар цу дохьажо хоададаь, наха юкъера моттиг толхаеш, сага сий доадаь.

Кагирхошта хьалхадоах из дин оагIорахьа доккха къа долаш хIама долга, хьарам хIамо сага ираз доаделгах. Наркотико цкъа вахар толхадаьча сага хала хул, тIехьагIа, тешаме саг хинна, наха хьалхашка дIаотта. Из деррига довзийт, тахан, къонабарашта.