Европан толамхой хилар вай спортсменех
Укх бетта 1-ча денгара 3-ча денга кхаччалца, Ставрополе дӀайихьача Европа чемпионате, котало йоаккхаш, белгалбаьлар вай спортсменаш Газиканаькъан Аслан, Доврбиканаькъан Исроапил.
Ерригача Европера дикагӀа бола спортсменаш гулбеннабар цига. Вай мехкахоша царгара котало яккхар, вай массане доаккхал де дезаш да. «125 кийлах латтача дозалах лоархӀаваь, хьалхара моттиг яьккхар Газиканаькъан Аслана.
Халкъашта юкъерча класса мастер ва из хӀанз. 100 кийлах латтача дозалах лоархӀаваь, шоллагӀа моттиги, ший зачете хьалхара моттиги яьккхар Доврбиканаькъан Исроапила», - дийцар «Сердало» газетага спорта гӀулакхех йолча министерстве.
Вай мехкарча спортанна боккха гӀа ба иштта котало яккхар! ДӀахойодача хана а, иштта вай къам дӀахьокхаш, лакхерча лагӀа тӀа бувлаш, дӀабаха аьттуви низи хилба вай спортсмений! Иразе, маьрша бахалба уж!
