ИнгГУ студенташа Россе Конституци шоашта мишта йовз хьагойтар
25.11.2023 01:40
ГӀалгӀай паччахьалкхен университета керттерча корпусе, шоллагӀча курсе багӀача студенташта лаьрхӀа безаме брейн-ринг дӀайихьар, Россе Конституце ткъаь итт шу дузаш хилара хетаяь, юридически факультето вӀашагӀъеллаяр из. Ловзараш дийкъа дар кхаь даькъа: хаттар-жоп далар; команда капитанашта юкъе блиц-яхь дӀаяхьар; хӀама довзарца-харца дувзаденна декхараш. Студенташа шоашта цу даькъ тӀа фу хов; Конституци, къаман истори довзаш хилара боарам хьагойтар.
«Хьаькъал эшача ловзарашка дакъа лоацаш ши команда яр: «Олимп», «Сириус». Бераша дакъа лацарга хьежжа мах оттабеш яр профессора Дикажанаькъан М.М. кулгал деш хинна хьехархойх латта кхел. Цу юкъе бар юрфака декан Ӏарчакханаькъан М.Ю. «Паччахьалкхен теоре, исторен, бокъон» кафедра кулгалхо, доцент Батыганаькъан З.О., доценташ Гандаранаькъан Л.Б., ГӀулой М.М., боккхагӀа бола хьехархой Шутуранаькъан Х.М., БӀарахой Е.А.», - аьлар «Сердало» газетага ГӀалгӀай паччахьалкхен университете.
