Барайтта шерга кхачанза йола тӏехье, боахамах дӏахоадае гӏийртачун дош судага кхаьчад
Квартирашца доккха зулам кхестадеш хинна мехкара вахархо суда духьалъоттаргва. Цу гӏулакха ларах тохкама болх дӏахьош хилар Россе Тохкама Комитета Магӏалбикерча оагӏон викалаш. РФ УК 4-ча даькъа 159 ст. бехктокхаме озаш ва зуламхо. Тохкама болхлоша белгалдечох, боккха тийшаболх кхостабаь, харцача наькъаца наьха квартира доала эттав зуламхо, фусамера саг тхов боацаш вуташ.
«Дӏабихьача тохкамо гучадаьккхачох, ший воша венначул тӏехьагӏа, цох йиса квартира эггара хьалха цун берашта кхоачилга кхетадеш волча зуламхочо бӏарчча тийшаболх кхостабаьб, цар хӏаманна доал де оттар духьа. Харцача наькъаца каьхаташ хьаийца, цу сага диса барайтта шерга кхачанза бераш долга нотариусах къайладихьа, веннача вешех диса хӏама ший цӏерах дӏаяздайта, доал де эттав из. Шоай даьх диса берий лаьтта, цӏа шийна хьатӏаяздаь, дӏахо кхы а юхедисар ший доала дерзаде хьожаш къахьегаш хиннав из. 12,4 млн сом мах бола хӏама да цо шийна дитар, барайтта шерга кхачанза дола венначун бераш шоай даьх дисача хӏамах доахаш», - дийцар «Сердалога» мехкарча тохкама оагӏон болхлоша.
Зуламхочо кхоастабаь тийшаболх гучабаккха, дӏахо цо мел лаьрхӏар дохаде аьттув баьлар ӏаьдала болхлой, цу берашта тӏаэтта царех дог лазаш вола саг латкъарах, цо оарц даккхарах. Суде тохкаш латт берий хӏаманна доал де гӏийртачун гӏулакх.
