Мохк бохабара тема цӀенхаштта гойташ я, гӀалгӀай суртанчий кхолламашка
ГӀалгӀай бохабаь 80 шу дизара хетадаьча, къаман таьзет а хинна дӀаэттача, ишта а зӀамигача къаман нах боабаьча сталински Ӏазапах долча къамаьлага гӀолла, Паччахьалкхен сурташ дехкарий музее дийцар, малагӀа моттиг дӀалоац басарашца болх беча наьха кхолламашка гӀалгӀай вахарерча саготонах йизза хиннача цу моттиго.
«ЦӀаккха дицлургдоацаш дола вай мехкахдахара хала шераш духхьал исторически а исбахьален а литературе хьахьекха ца Ӏеш, гойташ да ГӀалгӀайчен сурташ кхоллара искусстве а. ХӀара сурт – из йоккхача гӀайгӀан цхьа дакъилг, чӀегилг я; царех хӀарне дувц дагалоацамах, лазамах, кхерамах, тешамах, саготонах, къахетамах.
Паччахьалкхен сурташ кхоллара искусствай ГӀалгӀай Республикан музеерча балхий тематически оагӀоно дизза хьагойт, малагӀа уйлаш йолаш кхелла да уж балхаш», - яхаш, дийцар «Сердало» газетага республикан культуран гӀоръяьннача болхлочо, музея директора гӀонча йолча Йовлой Аьсета.
Хоам бу, кхы ши ди даьлча, суртанчий исскуствай Паччахьалкхен музее «Дагалоаттам» яха гойтам хьабелларгхиларах. Цига 70 совгӀа болх гойтаргба, искусствай цӀихезача болхлочун Цхьорой Аюпа кулгаца кхелла.
Музее баьхкарашта довзаргда цун басарашца даьхка сурташ, кулга говзалца кхелла балхаш, фотосурташ, цар массар а дувц вай къам мишта дохадаь хиннад.
