2014 шера хьакхелла ЦМИТ «Реноваци» программироване кӀоаргал Ӏомаеш, робототехника, 3D проекташ еш, дронашца болх бе Ӏомалуш хургдолча берашта лаьрхӀа йола дешара центр я. Из проект дика а хилар, тахан болх беш а я, ший дешара программаш дегӀайоалаеш.

«Алби» яха технопарк, гӀишлошъяра даькъ тӀа хургдолчунга боаккхаш бола гӀа ба. Цо де тарлуш дола балхаш да, гӀишлон даькъ тӀара аьшкабетона гӀирсаш, уж дӀахо вӀашагӀйохкар. Цу юкъе сага кхелла интеллект а йоалаеш, из дерригача гӀишлон хьала тӀахьожам лоаттабе таро йолаш хургья. «АЛБИ» технопарк, арахецара даькъ тӀара хьал хьакхелла хиларал совгӀа, цо новкъостал ду дешара программаш дегӀайоалае, болхлочунгара, инженерага кхаччалца бола говзанчаш Ӏомабу, цунца цхьана паччахьалкхен дешар дийша хилара тешал деш дола каьхаташ хьаэца а бокъо лу дешархошта.

«Хургдолчунга вуга билет» - из 6-11-ча классашка деша дагӀача берашта лаьрхӀа болх хоржа ерригроссийски проект я. «Дешар» яхача къаман проекта чуйоагӀаш хилара тарра, паччахьалкхено из хьал а лоац. «БВБ» декхар да, дешархошта шоай хургйола професси хоржаш новкъостал дар, цудухьа хаттарашка-декхарашка, беча балха тӀа шаьрваларга гӀолла чакхбала безаш хул дешархой.

Оарцена хетачох, таханарча заман сага ха дезар дукха да, компьютерца, кхыдолча технически гӀирсашца дувзаденна хьалаш царна дика ховш хила деза. Тахан сихденна додача вай вахаре, из ца хайча даргдоацар а да. Цу хьалах дикагӀа кхеташ хул бераш, зӀамига болча хана денз, гонахьа чоалхане технически «ловзоргаш», мобильни телефонаш, кхыдола хӀамаш хиларах.

«Вай мехка дукха да, тӀеххьарча хана арадаьнна Ӏилман тохкамаш юкъе а доахаш, дӀахьош дола бизнеса балхаш. Царна юкъе белгала ба татрий мохк, цига тайп-тайпара технопаркаш болх беш йола дукха ха я, цар бувзам лоаттабу дунен чу эггара хьалхалатташ йолча компанешца, цунца цхьана шоай мехка таронаш а тоаю цар», - аьлар Оздой Оарце.