«Къаман участкови-2024» яхача яхьашка, вай мехкара викал ва Илдарха-ГӀалий тӀара бокъонаш лораер
Россе МВД, «Комсомольски бакъдар» яхача газето укх бетта 1-ча дийнахьа дӀакхайкайир «Къаман участкови-2024» яха ерригача Россе хӀара шера дӀакхухьаш йола яхьаш. РФ чурча гӀулакхех болча оагӀон болхлой Ди чулоацаш йола яхьаш укх бетта 10-ча денга кхаччалца хилар. Цу яхьашка вай республика гойташ хилар Илдарха-ГӀалий тӀара участкови Баденаькъан Ӏусмана Руслан.
«Комсомольски бакъдар» яхача Кепайоазон цӀен порталага гӀолла ший кхаж тасса йиш яр хӀара сага. Уж лоархӀаме яхьаш я, хӀана аьлча тахан из болх беш латташ 47 эзар совгӀа болхло ва. Россе хӀара моттигера дакъа лоацаш цхьа саг мара хила йиш яцар. Уж бар моттигашка хиннача яхьашка хьалхабаьннараш, 300 эзар совгӀа болча Россе бахархоша хержараш.
Онлайн-хоржамашка гӀолла, мехка бахархой мел ба теркалдеш, дӀахьоргья эггара толашагӀа вола участкови хоржаш йола яхьаш. Котбаьннараш белгалбергба Россе МВД, укх бетта 20-ча дийнахьа. Царна яла лаьрхӀад Ульяновскерча машинаш хьаеча завода арахийца моллагӀча наькъашка гӀолла чакхйоалаш йола УАЗ «Патриот», иштта яхьашка котваьнначунна кхоачаргда яхьий лоархӀам белгалбеш дола «Халкъа участкови» яха борза совгӀат.
