Цо яхачох, конкурса кийчо еш дIабихьа никъ эггара чIоагIагIа тоам беш хилар дега. Хьехархочун сакъердалора, массарашта хоза хетаргйолаш малагIча тайпара оттайича бакъахьа я-хьогI урок яхача уйлашца.

«Аз цу конкурсе дакъа лоац из гIулакх дега геттара хоза хеташ. Итта вIашагIъеллача конкурсо хьагойт, ший урокацара хIаране кхетам. Из дика бахьан да кхы дIахо а дикка Iомалуш, ший болх тоабеш дIаваха. Конкурсе дакъа лацаро хьехархо, ма варра, хьавовзийт, кхычарна бIарахьежа ца ховр Iомаде а дика аьттув ба из. Шийна тIехьален цхьа дика котало я из! Кхерам, иштта, цунца дувза мел деннараш дIадаха а вIаштIехьадоал», — дийцар Зухрас.

«Укх шерара Россе хьехархо» — мехка керттера педагогически конкурс я. Цо гучабоах шоай гIулакха тIехьа эггара дикагIа бараш. Ерригача Россера хьехархой гулбеннаб цига.

Гаданаькъан Зухрас ишколе болх бу 10-шу совгIа ха я. Конкурсе эггара хьалха нийсъенний из, цунга хьежжа, кIеззига сагото кхест. «Котало, цун тIехьа доагIа совгIаташ — из иштта лоархIаме дац сога хаьттача. Эггара лоархIамегIадар да, дуккха хьехархой, иштта цхьана кхийтта шоай говзал хьокхаш хилар. Балхара новкъосташа доккха гIо даьд сона, са оагIув хьаллацарца дог ураоттадаьд.

Ишкола кулгалхо, цун гIонча, хьехархой — уж берригаш сона низ телаш бар. Иштта долча доккхача гIулакха хьо водача хана, гонахьа кхестараша хьа оагIув хьаллацар хам баь варгвоацача маьхе да», — белгалдир Зухрас. Конкурса хьалхара ши тур Тюмене дIахьоргья.

ХьатIабоагIача бетта 20-ча дийнахьа дIадоладенна, гуйран шоллагIча бетта 5-ча денга кхаччалца хургда из. ХIаьта, финали, котбаьннараш белгалбеш дола доккха гIулакхи Кремле дIахьоргда.