Юбилейни оала МагӀалбикера урам тоабеш боахк болхлой
30.04.2025 14:49
Вахара хьал тоадарах йолча программага гӀолла, МагӀалбикера моттигаш тоаеш болх ба дӀаболабаь. Карарча хана Юбилейни оалача урам тӀа къахьегаш ба болхлой. «Сердало» газетага из хоам бир шахьара администраце.
«Шахьар тоаяра тӀехьа лоархӀаме болх ба из. Куц тоадарал совгӀа, бахархошта паргӀатагӀа хургья из моттиг. Урамашкара хьал кхераме доацаш, бахархошта паргӀато луш хила дезилга белгалдир шахьара да волча Галай Мусас.
Проекта юкъе да керда асфальт Ӏобиллар, гӀашлой никъ тоабар, ток кӀезигагӀа юаш йола лампаш йохкар. Элтамаранаькъан Бек-хана кулгал деш, ООО «Стройальянс» я из болх шийна дӀатӀаийцар.
