Студенташца денала, кхерамзлен урок дӏахьош хилар; мехкарча Тохкама комитета болхлой
Балхара декхараш кхоачашдеча наькъ тӏа вахар хаьдача Россе чурча гӏулакхех йолча министерствон болхлой дагалоацаш, Чуранаькъан Х.Т. цӏерах йолча доагора-энергетически колледжа студенташца кхетаче дӏайихьар тахан. Цига дакъа лоацаш бар Магӏалбика кхален Россе СУ СК тохкамхо Могушканаькъан Ахьмад, «Россе эпсараш» яхача юкъарча моттигерча оагӏон хьалха латта Галай Руслан.
«Студенташта хьаьшаша дийцар лакха денал, майрал гойташ, къаман яхь лораеш, шоай декхараш кхоачашдеш лаьттача МВД болхлоех. Цул совгӏа, тахан экстремизм, терроризм яхача зуламах лораваларах, бӏеха гӏулакхаш доаржаде гӏертараш гучабахарах дийцар къонабарашца. Могушканаькъан Ахьмада дийцар хӏетта кхийнараш тийшача балха юкъе ца бахийтара тӏехьа йоаржаяь йолча «Никъ 31» яхача проектах. Кагирхошта хьалхадаьккхар, интернета оагӏонашка гӏолла тийшаболх боаржабе, къонабараш шоаш дувцачох тешабаь тувлбе гӏертача зуламхошта ка яла йиш йоацилга, моллагӏа тешаме ца хета хӏама зийча ӏалаьмате чехка ӏаьдалга хоам бе безилга. Шоашта фуд ца ховш дола адрес, хоам хьа ма белла, аьнна, хьехар дир къонабарашта», - йоах «Сердалога» мехкарча Тохкама комитетера бенача хоама тӏа.
Белгалде деза, иштта йола кхетаченаш къонабарашца каст-каста дӏахьош хилар лоархӏаме, тахан йоккха моттиг дӏалоацаш долга. Дунен хӏама, тийшача балха къайленаш йовзанза болча кагирхошта даьша, ноаноша, хьехархоша, ӏаьдала болхлоша хьалхадаха деза хӏамаш да уж. Моллагӏа цхьа тешаме ца хета тӏормиг, кӏопилг е гурмат зийча, фу де деза хьалхадаьккхар студенташта.
Даьхен хӏама зуламхоех лорадеш латташ; вахар хаьдарий наькъах, цар къахьегамах дийцар кхетаче.
