2023 шера 41 тишденнача цӀагӀара 195 саг ваха хоаваьв ГӀалгӀайче
Карарча шера «Тишденнача цӀеношкара нах баха ховшабарах» йолча республикан программанна чувоагӀаш, «Вахар, шахьара хьалаш» яхача къаман проектах 41 тишденнача цӀагӀара 195 саг ваха хоаваьв, яхаш, дийцар «Сердало» газетага республикан гӀишлошъераша.
Кердача фусамий юкъара моттиг я 2 256,20 кв метр. Из хьал цу наха хьадеш, дӀадахад 95 млн сом. Цу тайпара федеральни паспортах оттадь хинна цу гӀулакха тӀадерзадаь хьокхамаш 2022-2023 шерашка ма дарра кхоачашдаь даьннад»,- йоах хоамо.
Цул совгӀа, тишденнача цӀеношкара нах баха ховшабара бола 2023-2024 шерашкара болх, хӀанз укх сахьате кхоачашбаь а баьннаб. Уж ва нах чубаьхача 6 моттигера 24 саг.
Цу тайпара, планах 2024 шу йистедалалехь кхоачашбаь хила беза болх ГӀалгӀайчен гӀишлон министерствос йиллача ханал хьалха кхоачашбаьб. 2024 шера ГӀалгӀай Республикан гӀишлон министерство лаьрхӀа я, 29 квартира хьалъярца дувзаденна дош кхоачашде, уж ва МагӀалбика 132 вахархо.
Цар вахара хьалаш тоаде дезаш да. Федеральни оагӀорахьара дика новкъостал лоаттадеш хиларо таро хулийт тишденнача цӀеношкара нах кердача фусамашка баха ховшабе. Иштта дале а регионе кхы а я тишъенна фусамаш, царех да вӀаштӀара даь 27 цӀа. Цу гӀулакха а къахьегаш да федеральни а моттигера а Ӏаьдал.
