ГӀалгӀайче 2023 шера къаман проектех 50 гӀишло хьалъяьй
ДӀадахача шера ГӀалгӀайче хьалъяьй «Дешар», «УнахцӀено», «Дикал йола машина наькъаш», «ДегӀадар» яхача къаман проекташта чуйоагӀаш 50 гӀишло, яхаш, дийцар «Сердало» газетага мехка кулгалхочун Келаматанаькъан Махьмуд-Ӏаьлий зарбан болх лелабераша.
«Дешар» яхача къаман проекта чуйоагӀаш, итт ишкол хьалъяьй мехка шахьарашка, юрташка, юкъара хьаийцача 6038 моттига лаьрхӀа.
«Культура» яхача къаман проекта чубоагӀа дукхагӀа бола болх йистебаьккхаб; ДаьттагӀа, ГӀайрбика-Юрта культуран цӀенош хьалдаьд, иштта кхыча моттигашка культуран гӀишлош цӀенхаштта тоаяьй. «Дикал йола кхерамзлен наькъаш» яхача проектах цхьа тӀий, иштта 28 км хиллал бола ийс даькъ тӀара никъ тоабаьб.
«Фусам, шахьара хьал» яхача проектах 22 юкъара доазув тоадаьд, иштта Магас шахьаре парк хьалъе лаьрхӀад.
«ДегӀаахар», «УнахцӀено» яхача лостамагӀа, цу юкъе Шолжа-Шахьара ФОК, хьатӀаеш йола «Ветераний цӀен» гӀишло а йолаш, къаман проекта чуйоагӀаш йола гӀишлош йистеяьхай.
ГӀалгӀайчен кулгалхочо Келаматанаькъан Махьмуд-Ӏаьлас белгалдир, керда гӀишлош хьалъяра лоархӀам боккха хилар, уж я ишколаш, культуран цӀенош, машинаш лела наькъаш, дарбанчеш, иштта кхыяраш а. Кулгалхочо иштта белгалдаьккхар, уж юкъейоалаяро мохк дегӀабоалабеча доккха дакъа дӀалоацаш хилар.
2023 шера хьалъе йолаяьй ялх объект, уж йистеяха лерхӀ 2024 шу йистедоалаш, цу юкъе я ФОКаш, ишколаш, культуран цӀенош, наьха вахара хьашташ кхоачашдара йола гӀишлош. 2024 шера, иштта лерхӀ 30 юкъарлонна моттигаш хьалъе.
