Цох лаьца дийцар Мехкадаьца дIайихьача кхетаче гIишлой балхах йолча министерствон кулгал деча Балхой Микаьила. Министро яхачох, дIадахача шера дIадоладаь балхаш йистедаьха, керда гIишлош хьалйотта дIаболабала беза.

«Къаман проектага гIолла 2 млрд 182 млн сом дIахьожадергда дешара моттигаш хьалъе. Уж я 420 бера лаьрхIа йола Йоккхача Ачалкхера, ГIажарий-Юртара ишколаш, 540 дешархо чуэцаш йола Эбарга-Юртара, Инаркъера ши ишкол, 250, 720 моттигаш йола Шолжа-Шахьарера ишколаш. 2024-ча шерага кхоачаш я Южни оалача юртара 320, Наьсарера 720, Берда-Юртара 250, Пхьилекъонгий-Юртара 720 дешархочоа лаьрхIа йола ишколаш», — белгалдир министра. Кердача декхарашта юкъе я «Демографи» яхача къаман проектага гIолла хьалъе лерхIа 664, 2 млн сом дIагIоргдолаш йола гIишлош. Царех да Сурхо тIа хьалде деза вахача эшаш дола гIулакхаш ду цIенош, Шолжа-Шахьарера, Буро кIалхара физкультуран-могашала моттигаш. 2024-ча шера кийча хила езаш я уж. ТIой-Юрта хьалъергья 140,4 млн ахча дIадохийтаргдола дарбанче. Бахархоша шоаш, тоае еза аьнна, хьахержа 25 моттиг тоае 138,2 млн ахча лургда. «ЦIена хий» яхача федеральни проекте гIолла хий цIендеш йола станци хьалъергья, 246,1 млн сом дIадохийташ.

Культуран министерствон проектага гIолла хьалъе езаш пхиъ гIишло я. Царга дIагIоргда 86, 5 млн сом. Уж да ДаьттагIеи ГIайрбик-Юртеи хьалдеш латта культуран цIенош. Жайрахьа дIадоладаь цу тайпара цIа 2024-ча шерага даь даргда. Боккха болх дIахьош, тоае езарех я сурташ дехкачар музей, Инаркъера культуран цIа. Министра белгалдир, цу ерригача моттигашца ювзаенна контракташ 2023-ча шера бекарга бутт хьатIакхачалехь оттаяь хургья, аьнна.

Мехкадас Келаматанаькъан Махьмуд-Iаьлас белгалдир, тахан берригача мехка этта хьал санкцеш бахьан долаш аттачарех деце а, республике къаман проекташка гIолла дукха болх дIахьош ба, аьнна. «ХIара гIишло шахьаре, юрта ший ханнахьа хьалъяь хила еза. Болх боаггIача боараме, бехктокхаме дIахьош, кхоачашде деза деррига. Из керттера, доккха гIулакх лакха терко еш дIадахьа дезарех да», — аьлар цо.