Вай мехка, 2024-ча шера, 11 никъ тоабе лерхӀ
«Кхераме доаца дика наькъаш» яхача, шахьара куц тоадара тӀехьа кхеллача къаман проектага гӀолла, 11 никъ тоабе лерхӀ вай республике укх шера. ДкхагӀча даькъе, шахьара керттера моттигаш чулоацаргья цу балхо. Из хоам тха газетага бир Наьсарерча администраце зарбан болх лелабераша.
«Кхераме доаца дика наькъаш» яхача къаман проктага гӀолла тоадергда Наьсарера керттера урамаш: 3,25 км бола Наьсар-Кертен цӀерагӀа урам; 1, 58 км бола Могушканаькъан Д. цӀерах бола урам; 1,64 км дӀоахал дола ГӀайрбик-Хьажий цӀерах бола урам. Юкъерча административни куран тӀара урамаш: Железнодорожни- 2,43 км, Фабрични- 1, 53 км, ТӀаргимски- 1,19км, Барханой цӀерах бола урам - 0, 32 км, Октябрьски - 0,55 км, Базоркина цӀерах бола урам - 0,9 км.
«Шахьара юкъерча моттигашкара наькъаш тоадаь даха лерхӀ укх наькъа, Дала аьннадале. Цул совгӀа, боккха болх дӀахьош тоабе лерхӀ 0,9 км хургбола ЦӀечой цӀерах болча урам тӀара никъ, Гурьевски оалача урам тӀара никъ. Хьалхара урам къаман проекташка гӀолла тоабергба, шоллагӀбар - шахьара рузкъах.
