2026-ча шера 1528 вахархочо къахегама гӏулакхех бола бартчӏоагӏам оттабир
Ер шу доладелча денз, къахьегама оагӏонцара чӏоагӏо оттаеш болх дӏабихьараш 1528 эзар саг ва вай мехка. Из хоам «Сердалога» бера Мехкадаь зарбан болх лелаберашкара.
2026-ча шера цу оагӏонцарча болхлоша 151 рейд еш къахьийгр. Къахьегама оагӏонцара бокъонаш йохаеш дола 4657 кхоачамбоацар гучадаьлар цу юкъа. Из бахьан долаш, цхьаццаболча бахархоша боаггӏача боараме чакхдаьккхар цу оагӏонцара гӏулакх.
Дӏадахача шера цу оагӏонца дувзаденнараш белгалдеш йола 170 кхетаче дӏайихьар мехка, иштта СМИ гӏолла дӏахьош ба из болх. 1,1 эзар совгӏа нах ба къахьегама оагӏонцара бокъонаш йовзийтараш. 2025-гӏа шу долалуча хана вай мехка 21, 5 эзар гаргга саг вар хьатӏайоагӏача хӏаман тӏера йоал телаш, 2026-гӏа шу долалуча хана – 29, 8 эзар саг, хӏаьта бекарга бетта 1-ча дийнахьара хьал теркалдича – 30, 5 эзар саг.
Вай мехкадас Келаматанаькъан Махьмуд-ӏаьлас белгалдечох, къахьегама оагӏонцара гӏулакхаш боаггӏача боараме, ӏаьдала бокъоно дӏадеххача тайпара хургдолаш хӏара шера болх дӏакхухьаш ба мехка.
«Паччахьалкхен оагӏонца чӏоагӏдаь доацаш хӏама леладар гучадоаккхаш болх ба мехка дӏахьош, ер шу доладелча денз 848 моттиг я гучаяьннар. Экономикацара гӏулакхаш лертӏа хилийтара, бахархой бокъонаш лораяра тӏехьа чӏоагӏа лоархӏаме да из. Болх дикка къахьегаш дӏахохьоргба», - аьлар вай Мехкадас.
