ИГМК керда гӀишло хьалъе йолаергья 2026 шера
ХьатӀадоагӀача шера ГӏалгӀай Республикан гӀишлошъяра Министерствос керда гӀишло хьалъергья паччахьалкхен музейна лаьрхӀа. Магасе цу гӀулакха лаьрхӀа лаьтта хьакъоастадаьд. Проекта-маьха каьхаташ кийчдаьд. Кердача шера бекарга бетта 1-ча денга кхаччалца, яхь дӀахьоргья гӏишлонхой тоаба хьакъоастаяра.
ГӏалгӀайчен гӏишлошъяра Министерствос яхачох, 1,5 млрд сом совгӀа мах болаш йола «Культура дегӀайоалаяра» мехка проект болх бе йолалургья.
«2026 шера республике хьакхоачаргда хьалхара 263 млн сом. Проектага хьежжа, мехктохкама музея гӀишло кхозза вӏаштӏара яь хургья, эггара кӀалахара гӏат ларда чухьа а йолаш, юкъара йоккхал 7,5 эзар.кв.м. Дӏачувоаллача паргӏата уйче хургья, цу чу кассаш, наьха барзкъа хьалъолла моттиг, хаьхой моттиг, музея тика, хьаьшашта цӀено е моттигаш хургья. Иштта хьалхарча гӏата тӀа хургья кхоъ гойтама зал, юкъарча кхачан фусам, 10 эзар книжка дола библиотека.
ШоллагӀча гӏата тӀа лоацача хана деча гойтамий зал хургья, гойтама зал 141 кв.м., вӏашагӏъийнача хӏамай зал 226 моттига, галерея, дешара зал, догамаш деш бола болх дӀабахьара йола зал, гойтама зал. Аьрда оагӀорахьа, библиотека тӀа – музея хӏамаш лелаерий а Ӏилман болхлой моттиг, аьтта оагӀорахьа- универсальни конференц-зал 220 моттиг йолаш, эша хӏама лелаю чухьенаш, иштта администраци ӏеш йола моттигаш. Цу гӀишлон подвала чу музея гӏон йола моттигаш хургья, хӏама чуяхьаш е дӏахьош кийчъю фусам, хӏамаш кердача моттигерча мехкалга (климатага) дӏаӏомаю цӏа, ганза гӏирсаш, экспонаташ лораяра йола моттиг, тайп-тайпара пхьоалленаш, суртий лаборатори, зӀамига типографи, иштта кхыяраш», - аьлар «Сердало» газетага гӀишлон боахаме цу проектах лаьца.
Цул совгӀа, укхаза белгалдир, кердача гӀишлон тӀера кеп кхы а белггала мишта хургья ховш доацилга. Бакъда цунца гӀалгӀай къаман белгалонаш, къаман гахьара доакъош, гӀалгӀай архитектуранна тарадараш хургда, яхаш, дувц.
