«Дешар» яхача беркатеча къаман проектага гӀолла дӀабихьар из болх. «Юггазстрой» яха фирма я болх дӀабихьар. 3,8 гектар доазув да ишколо дӀалаьцар. 2021-ча шера гурахьа дӀадоладаьдар из гӀулакх. ГӀишлой балхах йолча министерствос тӀахьожам беш, дӀабихьаб из болх.

«700 дешархо тӀаэцаргвола ишкол кхозза вӀаштӀара яь я. 595 млн сом рузкъа да цу балхага дӀадахар. Таханарча хано дӀадеххача тайпара, мел эшар долаш хургья керда ишкол. ДегӀа могашал эшаеннача берашта лаьрхӀа а, цхьацца кердадараш юкъедоаладаьд цига.

Лора кабинет, царгаш тоаю моттиг, библиотека, кхача кийчбеш йола моттиг, йоккха спортзал, актови зал, иштта кхыдараш а хургда ишколе», - дийцар тхога гӀишлой балхах йолча министерствос. Ӏан хьалхара бутт бовш, кийча хургья ишкол.