Наьсарен юкъе шахьара сердал дикагIа хургья
Карарча хана Наьсарен-Шахьаре боккхагIа болча шин урам тIа сердал тоаеш латт. Говзанчий тоаба Кхоартой, Йовлой цIерагIа урамаш кхы тIа сийрдагIа хургдолаш кийчдеш я, яхаш, дийцар доал деча даькъ тIарча администраце.
«Ер шу дIадоладеннача хана а, цу гIулакха лаьрхIа хьожадаь шахьара бюджетера ахча дар, бакъда балхаш дIадоладе хIанз мара вIаштIехьадаьннадац. Шахьара керттера урам ба Кхоартой цIерахбар, доал деча даькъ тIарча администрацена лоархIаме да из тоабар, цига сердал лерттIа хилийтар. Цох тийша да шахьара куц, иштта наха дика хьалаш хилийтар», - аьлар тхоца къамаьл даьчо.
Ер шу дIадоладеннача хана, шахьара администраце оттадаьча декхарах Кхоартой урам тоабаь бар, «Кхерамзленна дика машина наькъаш» яхача къаман проекта чубоагIаш.
Из бахьан долаш, цига бахача наьха таро хилар шоай вахара хьалаш тоаде, хIана аьлча дика, хоза урам хилча, цо наькъа кхерамзленна Iалашо ю, новкъа леларашта дика никъ а хул.
