Йоазанхочунца Дударанаькъан Маккаца кхетаче дӀахьоргья Долакха-Юрта
14.11.2023 23:03
Шоатта дийнахьа Долакха юртарча культуран цӀагӀа кхетаче дӀахьоргья, йоазанхочунца Дударанаькъан Маккаца. Хьехархочун шу хиларца, бувзам болаш да из вӀашагӀкхетар. Из хоам «Сердало» газетага бир культуран цӀен болхлоша.
«Шун дегаш хьесташ, ду аз йоазош сай» яхача сайрен доакъашхошта бовзаргба йоазанхочун кхоллама никъ, цун беркате, дег чу ювшаш йола произведенеш. Шийна ловчо, цун байташ ешаш хоза дӀахьоргья сайре», - дийцар тха газетага.
Иштта йола сайре дӀаяхьара керттера бахьан да наьна мотт боаржабар, из мел кӀоарга, зовне, хоза ба гулбеннарашта дӀагойтар. ГӀалгӀай меттала дӀахьоргья из сайре. Наьна мотт бувцаш, дӀахьоча сайренал беркатегӀа фу хила йиш я?!
