Дахкилганаькъан ӏ. цӏерах болча Долакха-Юртарча урам тӏа асфальт биллар
Долакха-Юртарча Дахкилганаькъан ӏ. цӏерахча урам тӏа асфальт ӏобуллаш баьхкар болхлой. Из никъ лоархӏамечарех ба юрта, хӏана аьлча шин ишкола, фельдшерско-акушерски пункта, юртарча администрацена тӏабодаш ба из. Бахархошта доккха совгӏат хилар цу гӏулакхах. Паргӏата, кхераме боацача наькъ тӏагӏолла дӏа-хьа аха йиш йолаш ба уж хӏанз.
«Вай мехкадаьца 2024-ча шера телевидене гӏолла дӏахьош хиннача кхетаче дийхадар Долакха-Юртарча бахархоша; из никъ тоабе шоашта, аьнна. Республикан кулгалхочо Наьсарен кхален администрацена тӏадиллар цу гӏулакхах тохкама болх дӏабахьар. Цхьа шуи ах шуи даьнначул тӏехьагӏа, кхале керда кулгалхо Овшанаькъан Мухарбик оттаварца, кхоачашхилар бахархоша дукхача шерашка сатийсар. Маьцхали бетта 18-ча денгара 25-ча денга кхоачача юкъа, асфальт ӏобилла баьлар болхлой», - дийцар «Сердалога» Долакха-Юртарча администраце депутат волча Манкенаькъан Исмаӏала.
Юртарча администрацегара, иштта бахархошкара доккха баркал кхайкадир депутата Наьсарен кхален администраце кулгалхочун декхараш кхоачашдеш волча Овшанаькъан Мухарбика, иштта сиха из гӏулакх чакхдаккхарах. «Иразе, беркате хилба хьа вахара никъ, кхален бахархой хьашташ кхоачашдара тӏехьа боаггӏача боараме къахьега аьттув хилба хьа!» - аьлар Манкенаькъан Исмаӏала.
