Наьсархой цӏеношка МЧСа болхлоша цӏи ялара кхерамзлен гӏирсаш оттадир
Гӏалгӏайчен МЧСа, Паччахьалкхен цӏи ялара тӏахьожам лоаттабеча болхлоша, Наьсарен-Шахьара администарцеца цхьана вахара болам дӏабихьар, бахархой цӏера кхерамзлен хьал чӏоагӏдеш. Говзанчаша мах боацаш цӏи ялара кхерам болча хана хоам беш дола гӏирсаш оттадир, лаьрххӏача тӏема операце доакъашхой, дукхача дезалий, дӏа-юха лелалуш боацача наьха цӏеношка. Цун керттера маӏан да, нах бахача даькъ тӏа хатар хулача хана, хьалххе а цох хар, хӏана аьлча ара шелал тӏаеча цӏи ялара кхерам массехказа лакхагӏа хул.
Цӏи ялара кхерам хиларах хоам беш бола гӏирс зӏамига ба, бакъда цо сага вахар кӏалхардоаккх. Из пена тӏа е тхов тӏа дӏачӏоагӏлуш ба. Цӏи ялара хьал дӏадолалуш, кӏура массаза а лакхехьа хьалбодаш хул, цу гӏирсо из сиха зув, цо, цӏаьхха, чӏоагӏа оаз лу, цӏи ялара кхерам болга хайташ.
Уж гӏирсаш оттадарал совгӏа, МЧС болхлоша Наьсарен бахархошца цӏера кхерамзлен духьалара хьалаш довзийташ къамаьл дир, царна шоай телефона номераш дӏаелар, аьлар «Сердало» газетага Гӏалгӏайче гӏолла йолча Россе МЧСа Керттерча урхаллене.
