«Эггара чӀоагӀагӀа эшаш хинна, хий лоаттадеш йола бурув теха моттигаш хийцай цига. Дерригача доазон тӀа асфальт Ӏобулларгболаш, кӀалха кӀийле кийчъяьй. Чура гӀишло тоаеш боахк болхлой. Керда хоама гӀирс (сигнализаци) оттабаьб интернате. Хоза тоаяьй бераша кулг-юхь дулаш йола моттигаш. Кастта унахошта эшаш бола керда гӀирс, кхыйола хӀамаш хьачуяхьаргья цига. ПаргӀатта дарба де йиш йолаш хургба тӀаккха могаш боацараш», — йоах тхогарча хоамо. Из боккха болх дӀабахьа гӀо деш волча Гуцаранаькъан Микаилá доккха баркал оал ерригача республико. Таханарча дийнахьа цу интернате Ӏеш 20 саг ва. Царна юкъера дукхагӀбараш метта бадаш унахой ба, цудухьа царна гӀо дар боккха маьл болаш хургда Даьлагара.