Тхьаба-Ерд яхача киназа пхи кхера корабаьб
Тамашийна тӀехьален хӀамаш корадир дӀадахача бӀаьшерен Тхьаба-Ерд оалача киназа доазон тӀара. Уж корадир ГӀалгӀайчен лоамашка ЖӀайрахьа-Эса-ЧӀожерча паччахьалкхен историко-архитектурни, Ӏалама музея-заповедника болхлочунна. Массехк цу ханара йоазош тӀадола кхера корабаьб. Архиолога Гаданаькъан Умалата яхачох, уж гӀала тоаеш, цун куц даккха тоадаь да.
«Уж кийчдаьд ший тайпарча кӀаьдача кӀиран «ширими» оалача гӀирсашца, уж атта тоаде йиш йолаш а да. Корашта, наӀарашта хьоахаш хиннача маркхалах тара да уж. ДӀахо дисараш дикка тахка дезаш да. Укхаза корадаь кхерий тохкамхоша дикка тахка дезаш да», - аьлар Гаданаькъан Умалата.
Цу тайпара корадеш долча хӀамаша вайна новкъостал ду, дӀаяхача ханашка хиннар юха кердадаккха. Из эшаш да туризма, Ӏилман, дешара наькъаш тӀа. ГӀалгӀайчен лоамашка мел корадеш дола хӀама, республикан мехктохкама музее Ӏодужаш да. ТӀехьагӀа, культуран тӀехьале меттаоттаеш, дезаш хургда уж. Мехка исторически тӀехьале Ӏомаяра, лораяра лоархӀаме гӀа боаккхилга да из.
