«Дерригаш хӀана дац аьнна, гӀалгӀай тайпаш ГӀалгӀайчен лоамашкара хьадаьнна да. ЖӀайрахьа кхале, вӀаший юххе дукха нах баьхаб, вахара гӀишлош, тӀема гӀалаш хиннай. ХӀара нах баьхача юртара кхерах яь гӀишлош тоае лаьрхӀад оаха. Из болх тха дӀабахьа вӀаштӀехьадоал «САФМАР» яха дика гӀулакхаш леладеш йола проект хиларах, цун керте латтар ва Гуцаранаькъан Микаил», - аьлар республикан кулгалхочо Келаматанаькъан Махьмуд-Ӏаьлас, ше цу балха мах оттабеча хана.

Республикан из деррига дакъа техка а хӀара цунна чуйоагӀаш йола гӀишло дӀаязъяь а хургья, техка даьннача балхах уж дӀатоха дезаш хиларах.

Укхаза болх беш болча Ӏилманхой, археологий дукха теркам тӀабахийта безаш ба вахара а тӀема а гӀишлошта. Царех дӀаязъяь латташ яр 17, хӀанз 30 я, из да тӀехьара тӀа 13 сийленг техка хилар. 2023 шера ерригаш а лоамашка 68 гӀишло техкай.

Келаматанаькъан Махьмуд-Ӏаьлас белгалдир, цу мугӀарера кхы а 133 гӀишло тахка езаш хилар. ГӀалгӀайчен Кулгалхочо аьлар, цу даькъ тӀара болх йистебаьнначул тӀехьагӀа, наха гуш хургда, шоай даьша йита исторически тӀехьале мел лоархӀаме я.