Жӏайрахьарча Ӏоахарганаькъан цӏерах болча ураме, болх дӏахьош боахк тахан
Бахархошта юкъе дӏадихьача хоржамашка эггара хьалхарча оагӏонца меттабоалабе безарех ба, аьнна, къоастабаьча Ӏоахарганаькъан цӏерах болча урамера болх, ма хулла сихагӏа чакхбаккха гӏерташ боахк тахан Жӏайрахьа. Ер шу йистедалале кийча хила еза, аьнна, къоастаяь моттиг я из. Тахан белгалдечох, тов бутт чакхбоалаш, болх йистебаккха лерхӏ цига къахьегаш боахкачар.
«Керда асфальт ӏобулларгболаш, кӏалхара кӏийле тоаеш боахк болхлой. Гӏандаш дегӏа, хьаста гонахьара моттиг тоаяь хувцамаш дергда цига. Вахарерча гӏулакхех йолча къаман проекто шахьарерча моттигий куц тоадарах йолча федеральни проектага гӏолла, дӏахьош болх ба из.
Белгалде деза, Жӏайрахьа кхален моттигаш тоаяр, бахархошта юкъе хоржамаш деш, къоастадеш долга. Дӏадахача шера Фуртуог яхача юрта дӏачуоттачара моттиг тоаеш баьхкар болхлой. Плитка йилла, наха салоӏаш багӏа гӏандаш оттадаь, гаьнаш дӏаегӏа, лампаш ехка, кхуркхолг оттабир цига», - йоах «Сердалога» моттигерча Паччахьалкхено беча хоамо.
Шоаш бахача моттигий куц тоадарах долча хоржамашка дакъа лацар, геттара раьза болаш, хьаллоацаш ба мехкахой. Укх шера цу оагӏонцарча хоржамашка дакъа лоацаш хиннараш 67 эзар совгӏа нах бар. Эггара хьалхарча оагӏонца тоае езарех я, аьнна, бахархоша къоастаяьча моттигий куц эргадоаккхаш 16 дизайн-проект йоаржаеш, 8 доазон хьал меттадоаладеш къахьегаргда 2027-ча шера.
