Магӏалбике, тӏема сийлен шахьаре, мемориала кашамаш тоадир
«Цаӏ йолча Россе» парте «Исторически дагалоаттам» яхача федеральни проекта чудоагӏаш, къаьнарча Магӏалбика 36-ча даькъ тӏара тӏема кашамаш долча, лостам беш шоатта ди дӏадихьар. Гӏончаша из доазув нувхех цӏендаь а ца ӏеш, еха хинна карт а тоайир, иштта сийленг а кердадаьккхар. Цига дакъа лоацаш бар «Къонача эскара» болама доакъашхой, проекта моттигера болх лелабер, Гӏалгӏайчен Халкъа Гуллама Vӏӏӏ-ча вӏашагӏкхетара депутаталла кандидат Муружанаькъан Мухьмад, Юкъарлон совета проекта кулгалхо, региональни парламента депутат Бохтаранаькъан Мадина.
Исторически дагалоаттам - из денош, тайпан цӏераш, книжкай оагӏонаш хинна ӏац. Из кхы а я, вай Даьхе бахьан долаш шоай са дӏаденна нах дӏабехка кашамаш леладара вай бехктокхаме дола моттиг. Нагахьа санна сийленга тӏа цхьа хӏама еха хуле, цун юхе гӏолла тӏехвала йиш яц. Укхаза нийса дешаш аьнна а ца ӏеш, гӏулакхаца гойта деза ше деш дар. Къаьстта иштта хилар нийса да», - аьлар «Сердало» газетага Муружанаькъан Мухьмада.
Магӏалбик тӏема сийлен цӏи лелаеш я. Цудухьа вай декхарийла да Даьхен бӏухой дӏабехка моттигаш лостам болаш лелае. Тирка дукъ тӏа 1942 шера, Магӏалбик яккха моастагӏа тӏагӏертача хана, боккха тӏом лаьттар, дукха цӏий ӏомехкар. Котало йоаккхаш духьалъэттарех я из. Карарча хана укхаза дӏахьош да тохкама балхаш. Тӏема ханашка бейнача наьха тӏехкаш кораю цу моттигашка, уж тӏема сийле лораеш дӏабохк мемориала кашамашка.
