Гӏалгӏайчен Паччахьалкхен галерее хьаелларгья, АьдагIий къаман музей
Паччахьалкхен гойтама уйчен даькъ тӏа дӏаболабу «Черсий йоӏ. Товш, тӏехъяьнна хоза, лоархӏама кеп йолаш» яха мехкашта юкъера культуран проект - этнографически гойтам. Из кийчбаьр я Аьдагӏий Республикан Къаман музей. Цо таро лу республикан бахархошта, хьаьшашта Аьдагӏий къаман культура, ӏадат кӏоаргагӏа довза. Гойтаме дакъалоацаш болча наьха таро хургья ший тайпара кеп йола къаман барзкъа, вахаре лелабу гӏирс бовза, иштта довзаргда аьдагӏий кхалнаьха эхь-эздел.
«Гойтамга гӏолла довза йиш я аьдагӏий кхалнаьха нахаца гӏулакх лацар, цар къаьстта йола оамалаш. Цига иштта гойта оттабаьб къаман ӏадаташца бувзабенна вахарера кхуврч, тӏабувхабу кхалнаьха гӏирс, куца лелаю хӏамаш. Гойтамо чулоац Хӏӏ-Vӏӏ бӏаьшерен зама тӏаяле хиннача ханашка,иштта ХӏХ бӏаьшере чакхъялале лаьттача хана чухь баьхача наха шоай фусамашка лелаяь хӏамаш. Цо хьагойт тайп-тайпарча ханашка кхалнаьха вахарера хьал хувцалуш хиннилга. Темашка диллача гойтам шин даькъа бекъалуш ба: археологена, этнографена. Археологе оагӏоно дувц вахаре лелаеш хиннача хӏамаех, иштта дуккха а хьалха дӏаяхача ханашка кхалнаха куца лелабеш хиннача гӏирсах. Цу хана а шоашта фу мегаш я, из шоашка мишта товш я хьожаш хиннаб кхалнах. Этнографе оагӏоно хьагойт тайп-тайпарча ханашка аьдагӏий кхалнаха леладаь дувхараш, уж малагӏа ха йолча кхалнаха доагӏаш хиннад, малагӏча моттиге леладеш хиннад: берал, къонал, хьоалчагӏа, маьрел», - аьлар «Сердало» газетага Гӏалгӏайчен паччахьалкхен галерее.
ХХӏ бӏаьшере лорадаь музея мах бараш, тахан вайна къаьнара хӏамаш санна гойташ а довзаш а да. Цунца цхьана довзийт къаман ӏадат, цу къаман белгало. «Черсий йоӏ. Товш, тӏехъяьнна хоза, лоархӏама кеп» яхача гойтамо вахаре леладеш хиннар гойтарал совгӏа, кӏоаргга философи, эхь, эздел долаш хилар гойт, тахан а Кавказа къамаша уж хIамаш керте лоаттадеш да.
