Iайна музея массазара хьаша я, цо боккхача безамца хьаллоац музея болхлой санна кхыбола культура болхлой а, хIанз укх сахьте Iайнас деча балхашка хьежача гуш да дIахо йодача хана цо вай дуккхаза гIаддугаргдолга ший хозача сурташца, - аьнна белгалдир ше «Сердало» газета корреспондентаца къамаьлдеш ГIР ИЗО музея кулгалхо гIонча йолча Йовлой Аьсета.

Дикка ха яьнна яр Iайна из сурташ дахка йолалуча хана, цIихезача суртанчо Мартазананаькъан Мувсас дегчура дика хеташ цунна новкъостал дарах безабалар Iайнайна из болх. Мувсайна гуш дар говзал йола суртанча цох хургйолга. Iайнай хьалхара балха моттиг цхьаккха тайпара ювзаенна яцар сурташ дахкара балхаца, бакъда зIамига йолча хана денз кхоллама болх хоза хеташ хьаера из.

Цунна дика хоалу бос, атта дуллалу сурт-ший суртанчо –хьехархочо яхар атта хьаэц. Iайна дика кхолламхо я, цунна атта саг хьатIаоза хов, хIана аьлча нахах дика кхет из. Цхьан-шин шера кхы болх беш гаьна яьлча Iайна геттара сийрда талант йолаш, цIи хеза суртанча хургъя. Иштта из хургда аьнна тешаш ва ГIР суртанчи Союза кулгалхо, ГIалгIайчен халкъа суртанча Мартазананаькъан Мувса.

Iайна даькъал ювца баьхка хилар цунна гаргара нах, балха новкъостий. Уж бар ГIалгIай Республика культура цIи хеза болхло Оздой Башир, Элдарха-гIала Берий исбахьален ишкола дешархой Хадзинаькъан Танзила, Овшанаькъан ГIапур, ГIалгIай Республика халкъа суртанча Саганаькъан Бахьаудин, исбахьален цIи хеза болхлой Галай Адам, Цхьорой Аюп, республика суртанчи Союза кулгалхочун гIонча Гаркхой Мухьмад. Дукха хьаьший бар укхаза баьхка. Царех бар ГIалгIайчен культура министра заместитель Тоаркхой Рустам, ГIР Халкъа гуллама кулгалхочун гIонча Светличный Василий, Халкъа гуллама депутат Ахильганаькъан Сейт-Салам, Ч.Э. Ахриева цIерагIча ИнгНИИ социально-политически тохкама отдела кулгалхо Iарапханаькъан Лейла, ИнгНИИ йоккхагIа йола Iилма болхло БIархой Людмила иштта кхыбараш а.