Инвестицеех йолча Кавказерча кхетаченга кийчо ярах дийцар Шолжа-ГӀалий тӀа
РФ экономика дегӀакхувларах болча оагӀон кулгалхочун гӀонча волча Назаров Сергейс кулгал деш, кхетаче дӀайихьар Шолжа-ГӀалий тӀа. ВӀашагӀкхетаре дийцар, хьатӀайоагӀача Кавказерча кхетаченга кийчо ярах. Из хоам «Сердалога» бир из гӀулакх вӀашагӀделлараша.
«Нохчий мехкарча кулгалхочун резиденце, «Стройкар» (ЭКСПО) яхача из кхетаче дӀаяхьа лерхӀача фусаме баха, кхетаченца дувзаденнараш къоастадеш хилар хьакимаш. ХьатӀабоагӀа дукха хьаьший тӀаэцарца, логистикаца, культуран программаца дувзаденна дукха гӀулакхаш да тахка дезаш», - йоах хоамо.
Кхетаче дӀахьоргйолча ахкан шоллагӀча бетта 15-17-ча деношца дувзаденна, дукха декхараш да кхоачашде дезаш. Мехка йоаржаеш латта дикагӀа йола проекташ йовзийташ, кхыча мехкашкара инвестораш тӀаоза лерхӀ цига. Кхетачен керттера тема - «Йоккха Кавказ: фордагара фордага кхаччалца». Тайп-тайпарча оагӀонех йола кхетаченаш юкъегӀоргья цу программанна.
